上周三，中央落實喺2月1日執行土地增值稅，加強調控內地過熱嘅房地產市場，大陸地產股應聲狂插，富力地產（2777）同雅居樂（3383）當日分別勁跌8.6%同8.2%。網友古堡鋒做咗個調查，問喺呢個形勢下，會點投資大陸地產股。約42%網友話仍然睇好大陸地產股，但只會買大型及優質股；26%持觀望態度，睇定啲先入市；8%就話會喺低價吸納；20%話已經沽晒手上嘅房產股。
對於大陸地產股近日嘅跌勢，ppp360對前景唔多睇好，「大陸房產股儲埋晒大量貨唔賣，睇個勢嚟緊會加快平啲出貨，股價應該仲會跌落去。」Yatw亦指，「之前內地房產股已經升咗好多，預計會回番20%左右。」
部署趁低吸納
有人辭官歸故里，有人漏夜趕科場，網友yylam173就唔多擔心，佢話：「長線仍然睇好，不過短線股價會再受壓，𠵱家已經低位買咗一注瑞房（272），如果再跌到去6蚊，就再入多一手。」Stella_Food亦話會趁低吸納，但嫌佢𠵱家仲未跌夠，會等再跌多啲先入貨。RooHo仲話：「會分階段吸納，愈跌愈買。」網友Goodgoodhk慨歎冇錢，冇得趁低買優質房產股；Sonybird就諗定會買龍頭股中國海外（688）。
高盛發表報告指，土地增值稅對地產發展商構成負面影響，削弱邊際利潤；而瑞銀則指要視乎公司作出多少撥備，05年以後上市嘅公司因做足撥備，盈利影響會較輕微。其實，大型大陸地產股如中國海外、富力地產及雅居樂過去一年多已分別累升1.5倍、1.2倍及77%，不過，經過兩三日調整後，周五紛紛反彈至1.07至3.43％。