陳慧琳（Kelly）與男友Alex相戀13年，感情生活甜如蜜，去年更傳出兩人於美國拉斯維加斯註冊結婚，但Kelly否認婚訊，她說：「我真係未結婚，如果我要結婚，一定會大事鋪張，公告天下。結婚係開開心心嘅事，冇必要咁鬼祟。一世人只靚一次，點會靜雞雞嫁咗去咁笨！」
單純男友難求
說到底，到目前為止Kelly既不願嫁也不言退，還是為了事業：「可以嘅話，我希望可以再拖多兩年，因為我事業心好重，係百分百工作狂，仲想搏殺多兩年，呢方面Alex已經同我有共識，唔會再催我結婚，其實我就一定係嫁畀佢，但𠵱家我真係未有心理準備做少奶奶。」
這段感情其實也經歷過風浪，Kelly與Alex於99年分手，兜兜轉轉半年後，兩人又走回一起。
Kelly笑謂：「可能揀嚟揀去，發覺都係我最好，咁咪再追求番我囉！其實嗰次分手嘅起因都係因為我工作太忙，冇時間陪佢，兩個人為呢個問題成日嗌交，惟有協議分手，但分開咗要重新識過男仔，當然係一件難事，一來我成日唔喺香港，人哋約我一、兩次都食檸檬仲唔掉頭走咩？二來又驚人哋同我一齊唔知會唔會有所圖，要再搵番一個好似Alex咁單純嘅男仔，我諗會幾困難。老實講，我諗其他人都冇佢咁單純，所以當佢再追求番我，兩個人又好自然走番埋一齊。」
跳樓機歷生死
一段感情失而復得，兩口子當然會更加珍惜對方，無論現時有多忙，Kelly都會盡量抽時間陪伴男友，她說：「近幾年我主攻海外市場，特別係內地，經常要飛嚟飛去，但只要喺香港，我都會盡量抽時間陪佢，如果我要出埠做嘢，佢又有假期，咁我會叫埋佢一齊去，好似啱啱嗰個聖誕我要去美加登台，Alex咪同埋我一齊去，咁我哋咪可以一齊過聖誕。喺呢啲節日，我當然想同佢一齊過啦！」
與男友逗留拉斯維加斯期間，兩人還抽空玩跳樓機，感受命懸一線的滋味，令Kelly大呼刺激：「我仲想玩笨豬跳呀！之前我試過喺澳洲簽生死狀跳降落傘，真係心都幾乎跳埋出嚟！做人咁悶，有時都要玩吓、挑戰吓自己。如果有機會，我都想試吓喺大海同海豚一齊游水，我諗呢個感覺會好奇妙。」