八十年代日本前首相中曾根康弘噚日嚟咗香港，參加香港柔道館40周年祝賀會，館長岩見武夫係佢嘅政治門生，同場仲有九鐵行政總裁詹伯樂（花名尖畢甩），原來佢同岩見一齊創立香港柔道總會，真係失覺，肥肥嘅尖畢甩學柔道已56年，仲係黑帶高手！
同埋個仔一齊嚟嘅中曾根康弘，八十幾歲人仲好好中氣，腰板挺直，隨員講明佢「不談政治，只談柔道」，前首相話柔道可以幫人化解壓力，但佢本身唔打柔道，只係玩golf！今次專程飛嚟，只係為咗徒弟，師徒之情，真係令八方感動。至於尖畢甩，將柔道比喻為上司與下屬關係，就係：「你要一邊應付你嘅對手，但同時也要關心佢，不要令他受到太大傷害。」嘩，真係金句，唔怪得政府搵佢收拾九鐵勞資關係惡劣嘅殘局啦。