醫生理應反對吸煙，但唔少醫生原來都係煙民，好似本身係醫生教統局局長李國章咁，都曾經係煙鏟，戒煙原來要多謝個仔。李國章話，佢喺86年1月戒煙，當時同屋企人食飯，飯後梗係要食一支煙，嗰時大仔得10歲、細仔6歲，點知佢哋突然話：「Daddy再食煙就會死！」跟住就坐喺度喊，搞到全間酒樓嘅人都望住佢，自從呢次之後，佢就決定要戒煙囉。
李國章噚日去咗民主黨12年黨慶晚宴。佢話，雖然冇送「白紙扇」畀張文光，但佢哋點都係「真兄弟」，如果張文光做咗梁家傑嘅教統局局長後，唔請佢做副局長或助理，佢就肯定失業，希望張文光到時多多關照喎！李國章講反話真係叻，口才同張文有得揮。