「手汗多」大熱倒灶，攞唔到三色台嘅當紅歌星獎，好多人都覺得好意外，其實呢個獎畀「癲神」都係合理嘅，只不過佢之前係咁亂講嘢得罪咗三色台，大家就錯覺認為佢實冇運行。
份人假假哋
誰不知原來三色台班高層對手汗多印象麻麻，所以投票時，佢比較蝕底，因為製作部「愛姐」同佢早有牙齒印，事關好幾年前手汗多答應簽約拍劇，但最後又反悔，激到愛姐紮紮跳。愛姐喺三色台梗係有影響力啦，同「數字高層」又老友，一早篤穿手汗多背脊，加上「大師高層」又唔係特別對佢有好感，仲覺得佢份人假假哋㖭，所以最後一次開會時，幾個高層就拍板畀癲神攞當紅歌星獎囉。
Textby關仁
