大家知唔知德國上年電影票房冠軍係邊套片？唔係《加勒比海盜：決戰魔盜王》（PiratesoftheCaribbean：DeadMan'sChest）同《變種特攻：兩極爭霸》（X-Men：TheLastStand），而係擁有超過530萬人次入場睇嘅德國本土電影《香水─一個殺人者的故事》（Perfume：TheStoryOfAMurderer），呢套片來頭唔小，除咗由《疾走羅拉》（RunLolaRun）導演執導外，仲有金像影帝德斯汀荷夫曼（DustinHoffman）客串，片中更有唔少令觀眾聞到「有味」嘅場面。 撰文：戶川淳
今個星期四（25日）本地正式上映嘅《香水》，改編自德國著名作家徐四金（PatrickSuskind）嘅著名小說，故事主角因為迷戀女人香味，專門謀殺年輕女性，並從佢哋身體嚟提煉香水，聽落都幾得人驚！原著唔止被繙譯成42種語言，仲賣出成1,500萬本。
聽聞徐四金一直拒絕將版權出售畀荷李活片商，最終德國電影公司7年前以成億港元買咗電影改編版權，仲投資5億港元作為製作費，成為德國有史以來最貴嘅電影。
影帝自薦演出
電影由以小本舊作《疾走羅拉》打響名堂嘅德國國寶級導演湯泰華（TomTykwer）執導，身為佢影迷嘅奧斯卡影帝德斯汀荷夫曼亦主動自薦演出，德斯汀仲話：「湯泰華是個很清楚自己想要甚麼的人，每次工作他都準備就緒。他很尊重演員的意見，不是每位導演都這麼開明。」
為咗物色扮演深不可測嘅天才主角，導演花咗整整年半時間，最後佢放棄選用里安納度狄卡比奧（LeonardoDiCaprio）同尊尼狄普（JohnnyDepp）等巨星，揀咗演技出色嘅英國戲劇演員賓韋沙（BenWhishaw）。
突破歐洲影史
最特別嘅係片中有一段人群喺廣場等待男主角被處決嘅場面，當眾人聞到男主角身上嗰股絕世香氣嗰陣，個個表現出忘我境界，甚至群起脫衣舞作樂，呢個場面獲得唔少影評人稱讚為歐洲電影史上嘅一大突破㖭。