長輩成日話將來要好好管教丈夫，又話女人青春有限，男人一旦有錢有成就就會「身痕」，所以要睇緊啲。呢番話對於未有結婚打算嘅我暫時用唔着，何況我認為女性應該自食其力，唔應該畀丈夫牽住鼻子走！
獲加搭上舞蹈員鬧婚變
間中都睇到丈夫因外遇棄妻的報道，我呢個大女人都為嗰個老婆唔抵！前日睇新聞知前英格蘭國腳門將獲加婚變！獲加結咗婚13年，育有1女，佢老婆Suzi係靚女，報道話多年來佢對丈夫無微不至。估唔到獲加一次去美國處理投資事項，就搭上做舞蹈員嘅Samantha，結果就個幾月無同屋企聯絡！
從網上圖片見呢個Samantha，幾冶豔，仲有幾分狐狸精feel，同Suzi差好遠！獲加居然放棄美好家庭，簡直係大笨蛋！希望抑鬱嘅Suzi盡快堅強起來！
我認為球星除咗球技要令人信服，本身人格都好重要。若果我最鍾意嘅軒斯或者泰利好似獲加咁「搵阿二」，我都唔會再追捧佢哋！
WENDY
由歐國盃EuroBabes，變身球彩台受歡迎主持。