1.全球重視生態環境，中國亦唔例外。天津市銳意發展成為生態城市，天津創業環保（1065）食正條水，本周出擊對象，就揀呢件。
FollowMe去年9月17日首次推介津保，當時2.01元，升至2.54元後反覆3個月，上周五收2.48元，比起步位只升23%，跑輸期內H指43%嘅升幅。同業中國水務（855），期內升幅40%，津保有追落後條件。
論基本條件，更加吸引。津保大股東係天津市政府，業務皆與水有關，早有「水中淘金」稱號，內地傳媒形容佢識將污水「變」黃金。
受惠水價改革
時勢造英雄，中國大力推行水價改革，落實污水處理政策，所有城鎮都要開徵污水處理費，津保得米，肯定大大受惠。
睇業績，津保06年度（12月年結）頭3季賺1.53億元（人民幣．下同），已相等於05年度全年近9成，全年預測2.13億元，增2成，預測PE15.8倍，低過中國水務40倍好多。
睇P/B，津保又係正到痹，P/B1.41倍，拍埋中國水務9.69倍，折讓大到無倫。照中國水務打個7折，津保值11.87元。
要津保狂升近4倍，似乎貪心啲。保守估計，津保至少要重返94年掛牌以來3.175元高位，升幅28%。
睇3.90元
睇遠啲，唔係上望3.175元咁小兒科。津保污水處理業務，由基地天津打到杭州，遲早晉身內地水業龍頭，引發基金入股浪潮，目前已有ISIS扯頭纜，持5.08%。H股市值得8.4億元，基金唔夠分，好快嘭嘭聲，PE上到25倍，都仲係平過外國同業，就已經3.90元。
高彰坡