創業同投資嘅共通點係，兩者都涉及資金成本，成功嘅話，回報可以高到難以想像，如果不幸失敗，後果卻可能不堪設想。不過，對剛踏足社會、愛冒險嘅年輕人嚟講，即使欠缺經驗，創業或投資對佢哋同樣吸引。
here-i-am問：「好多有關理財嘅書都教人及早投資，有啲仲話創業或投資房地產，其實仲好搵過安安份份打一世工等退休，此話當真？係咪真係啱年輕嘅行外人？你哋又點睇？」
2kids10horses就話：「如果已經諗到鴻圖大計，就梗係要趁後生去博，蓋茨都係咁啦﹗不過，雖然炒樓確係一個幾好嘅搵錢方法，但千祈唔好諗住一夜致富，所謂『力不到不為財』，買樓扑槌前要諗定個單位值唔值租，又或者計清楚轉售圖利有冇水位，而且炒樓同創業一樣，需要無比嘅毅力。」
考個地產牌 摸清才投資
WindyCityPaul1認為：「創業同打工最大好處係自主性強，你可以選擇親身上陣，又或者請人幫自己爭取更多回報。不過，打工就手停口停，而且無論你有幾落力、做得有幾好，你都唔能夠將工作表現以高價『賣』畀其他人，然後離場享福，頂多都係老闆加人工畀你繼續捱。」佢話數年前以微薄嘅資金創業做老闆，雖然自己已經兩年冇直接參與公司業務，甚至有半年冇踏足間公司，但一直都有好穩定嘅收入，當然呢筆錢唔夠佢退休養老，但至少已經夠佢生活、唔使打工都有錢收。
網友expectingmom75就教路：「我就話乜都假，有錢應該先儲起以防不時之需。創業就更加要儲多啲『彈藥』，對於自己唔熟嘅行業一定要了解清楚先好入行，千祈咪盲舂舂跟風。如果想投資地產，不如先考番個地產牌先。」