關心妍鑲鑽手鈪
「呢一隻係新一季推出嘅LOVE系列手鈪，之前嗰隻係冇鑽石嘅，今次呢隻就有鑽石。其實我一向都有儲開呢個系列嘅首飾，因為呢個款幾時戴都唔會過時，同埋呢隻鈪係有鎖匙打開嘅，條鎖匙就係一條頸鏈，我覺得個design好特別。」
方力申懶人Cap帽
「呢頂帽係古巨基喺日本買畀我嘅手信，屬於CA4LA限量版，頂帽個圖案係人體素描，加上一個小小嘅襟章，配搭簡而清。我本身髮質好軟，平時放假懶得整頭，就戴帽出街，所以我都有好多頂。」
薛凱琪友情鏈墜
「呢個鏈墜係鄭融送畀我嘅，之前我哋一齊舉行演唱會，大家交換禮物，我同佢一人一條，仲有條手鏈都同鄭融一樣㗎！我着嘅衫比較簡單，所以特別鍾意呢啲小飾物，有嘢襯托吓會靚啲。我屋企有好多飾物㗎，爹哋仲特登整咗個人咁高嘅櫃畀我擺嘢。」
鄧健泓熊仔波鞋
「我本身好鍾意着波鞋，屋企有好多對，今日呢對係贊助嘅。我最鍾意揀啲得意款，就好似呢對咁，有隻熊仔，又係今年最流行嘅漆皮，波鞋除咗好着，仲可以襯衫，平時都會成日着Converse呢個牌子，仲可以襯埋西裝㖭。」
採訪、攝影：李珮洳、馬建華、王連連、楊潔雯
