環境運輸及工務局局長廖秀冬都算係官場裏頭嘅中女代表人物之一，初入政府時形象斯文淡定，有啲似藝人毛舜筠，幾有觀眾緣，不過溫柔高官都需要鬆一鬆，公餘嘅冬冬，情感解放，真情流露，同你身邊嗰啲開心時會擘大口叫拍晒手跳嘅中女無分別，唔信？有相你睇。
噚日香港大學校友會響沙田馬場辦咗場錦標賽，全日賽事都以港大學系命名，一大班昔日港大舊生難得碰面，個個雞啄唔斷，玻璃廂房內出現一位馬場稀客，佢就係冬冬喇。佢話平時甚少入馬場，但為咗見吓班同窗，再忙都要嚟行吓，佢將啲頭髮電曲咗，比之前個BOB頭更有女人味。八方現場觀察，佢表現投入，去得好盡，尤其係第三場隻「有景」僅贏個馬鼻返嚟，冬冬即時緊握拳頭舉高隻手，個樣鬼咁肉緊，旁若無人。
重頭戲港大校友會挑戰盃，戰果就冇乜驚喜，事關頭馬係大熱門「蓮華生輝」，買10蚊派13蚊，贏3蚊，乃今季獨贏派彩新低，頒獎嘉賓嘅就係港大校友會會長何定邦及港大校長徐立之。
大情大性唔愛擦鞋
冬冬真性情睇嚟係天生嘅，佢早前欣賞歌神許冠傑演唱會時，就不避忌同埋班城中女士一樣，接受歌神錫錫面珠嘅熱吻祝福，睇佢個樣非常陶醉，暈晒大浪咁款，一般女高官未必有咁嘅勇氣！仲有一次，佢出席立法會議員足球比賽，旁觀賽事時緊張到飛起，Ｏ晒口形，七情上面咁吶喊助威，仲投入過比賽場地裏面嗰班男人。
官場中人話，冬冬做咗問責官幾年，睇嚟7月係時候讓賢，可能因為咁，所以佢一早已經豁咗出去。有次某高官同人講，話肥平最多係唔做嘢；冬冬雖然做嘢，但就係成事不足，敗事有餘，即係話做出嚟嘅嘢反而破壞好事，睇嚟佢講緊嘅係交通機構可加可減機制。
有議員話，冬冬不嬲都係大情大性，佢唔鍾意拍人馬屁，又唔似得肥龍、孫公呢類老狐狸咁蠱惑，可謂當今官僚體系裏面嘅一道清流。不過亦有議員覺得冬冬喺議事堂內一向表現傲慢，唔多同議員交流，明知政府有錯都要死撐，講嘢又天花龍鳳，好多時講咗等於冇講。
講開噚日嘅馬場，已故麗新發展主席林百欣嘅大公子林建名，名下隻「瀟灑大少」出賽跑四班1800米，同場嘅仲有新世界鄭裕彤大公子鄭家純隻「錢順來」，呢兩位富豪第二代嘅愛駒，構成呢場最多人買嘅大熱連贏，可惜最終都跑唔出。
