香港股民熱衷抽新股，不過唔能夠淨係靠嚟自大陸嘅新血，本地到底有冇好嘢可以上市呢？
Goldenyellow喺《香港討論區》提議，將香港賽馬會同香港廸士尼上市，一來集資，二來還富於民，佢解釋話：「賽馬會上市，有更多資金開更多投注方式，例如六合彩開單數或雙數。至於廸士尼上市，可以畀更多人做股東，𠵱家太細，只係似一個私人別墅小花
園！」
馬會做慈善冇盈利
不過，正如其他網友話齋，馬會係慈善機構，冇盈利，所以上唔到市。咁廸士尼呢？網友香港寬頻話：「你想做水魚就去買。」哨牙甸佬就講：「香港廸士尼啲不平等條約，搞到賺唔到錢，遲啲如果上海又搞一個廸士尼，就真係玩完！」
如果真係上到市又點呢？pkelf提議：「到時大家一齊沽爆廸士尼，為歷史見證！」
集體回憶梗買土產
其實，香港嘅土產海洋公園，先至係網友杯茶！唔少網友提議佢應該上市，但就冇乜詳細解釋！翻查資料，相信原因應該係：（一）海洋公園1977年開業，老中青股民都會對佢有一定情意結，尤其𠵱家興集體回憶；（二）香港製造，再加多啲人情分支持；（三）大家覺得CEO盛智文掂！
唔係講笑，當日廸士尼殺入香港嗰陣，大家諗住海洋公園死梗，但「蘭桂坊之父」盛智文輕而易舉用幾條海獅、海豚，鍊低咗米奇同米妮，即時人氣勁爆成為香港人偶像，嗰陣經已有網民建議海洋公園上市，但指明要由佢繼續揸fit至肯捧場！