發展商賣樓或代理幫發展商賣樓，無論樓書或者宣傳品嘅圖片，或多或少都做過手腳，直頭要寫十個服字畀佢，但亦有疏忽大意，一時失手之作。好似明眼人hcube，一眼就睇到中原地產同美聯物業兩個代理，喺網上擺嘅荃灣新盤HCube汀九橋景相片，假到出汁。
hcube仲將張相post咗係《Uwant討論區》上，踢爆話：「原本汀九橋之三座橋塔皆為獨腳，分別建於汀九、藍巴勒海峽中之人工島及青衣西北海岸（詳見 http://www.tsingma.com.hk/Web_pages/Intro_tmca/ting_kau_bridge_c.htm）。海上只有一個人工島，但HCube嘅圖片無端多了兩座橋塔及一個人工島，海市蜃樓，移花接木技巧拙劣，簡單資料搜集都冇做，其餘破綻都唔少，買家一不留神買入所謂海景單位，投訴無門，因為所有圖片只供參考。」
死對頭用同一張相
kamleeon99都睇到啲嘢：「左邊窗啲倒影唔知係唔係假嘅，不過冇所謂啦，我只係知工廠喺身邊（隔籬）。」
睇番兩張相，手工又的確差得離譜，盲嘅都睇得到。可以畀大家玩吓「尋找錯處」遊戲。不過有啲奇怪，中記同美記不嬲都係敵對，點解兩張相完全一模一樣嘅？唔通係發展商南豐畀嘅？