車仔內訌一發不可收拾？求大俠收到可靠線人報料，車路士班主阿巴莫域治，正吼實領隊摩連奴話明唔要嘅費蘭度托利斯，擺明剃佢眼眉；又有傳被隊友認定為二五仔嘅「軍刀」舒夫真高，正游說老闆搵AC米蘭教練安察洛堤領軍，擺明爭權；據講油王好有可能避席周六球隊作客利物浦嘅聯賽激戰，費事眼寃喎！
油王架空摩帥拒絕捧場
雖然一邊話縮皮唔增兵，但車仔班主阿巴莫域治一邊又暗向親信兼球隊行政總裁晏尼臣下密令，叫佢動員西班牙球探去睇馬德里體育會「王子」費蘭度托利斯，懶理摩帥之前話明唔需要「王子」嘅強硬態度，擺明車馬同佢唱反調。
此外，阿巴莫域治亦密謀招攬樸茨茅夫技術總監格蘭，取代摩帥副手、現任球隊助教奇勒，藉此架空摩連奴喺隊內權力；唔止呀，英國報章更指，車仔周六作客利物浦嘅大戰，阿巴莫域治極可能罕有地連觀眾席都唔坐，費事傳媒將佢同摩帥嘅爭拗俾傳媒愈描愈黑，影響球隊士氣。
同坐一部「車」，睇見風頭火勢，明知自己位置有危機嘅舒夫真高就先發制人；為咗鞏固自己勢力，竟不擇手段地向阿巴莫域治建議搵AC米蘭主帥「肥安」安察洛堤做領隊，誓與前帥續緣改運，並明言周六之戰可正選披甲，真識做人！
「平日都經常聽到啲老死同求大俠呻啲辦公室寃屈……，唉，求大俠都係想睇波忘憂啫，咁鬼多人事轇轕，聽到都頭暈！」