每當跟朋友講起試紳寶，幾乎劈頭第一句開場白就係：「大T定細T？」，我必回敬：「你估Shopping買衫咩？大T定細T。」係，係我錯，以前未試勻大細T（Turbo，渦輪增壓），以為兩者差無幾，直至近來有機會試「細」又試「大」，發覺原來「大T」感覺果真比「細T」勁，起步爽快利落，即使今次試的只是Vector2.0版本，但已發覺大T強橫扭力和210匹馬力真係唔嘢少！新版底盤經過調校，大壓力加上Sporty底盤，原來新版9-3Vector唔止大細T之分咁簡單！
記者：黃婉冰
攝影：譚盈傑
Model：Joey
話你知：何謂渦輪增壓？
渦輪增壓器（Turbo）運作原理，係將引擎排出嘅廢氣推動渦輪葉片，而渦輪軸另一面嘅空氣壓縮機將進入引擎嘅新鮮空氣壓縮，然後供引擎燃燒之用。相比舊式增壓，渦輪增壓所消耗馬力較少，所以不少新款跑車均已改用這種渦輪增壓技術，令馬力提升成本不致大幅上升。
Turbo全程發力 波箱未夠靈敏
一向分得很清楚，跑車就係跑車，房車就係房車，即使規格表白紙黑字大大隻字寫到明話有Turbo都好，我依然會以揸房車嘅姿態去試！今次亦唔例外，由跳上車一刻開始，全程均以斯文態度對待眼前這部紳寶9-3SportSedan2.0Vector。大T不愧為大T，起步一刻爽快直接，扭力好明顯係綽綽有餘，起碼無令我𤷪到即刻想跳車！一開始Turbo慢慢發力，望住錶板支顯示針向上慢慢升，全程有Turbo相伴，勁玩得！
試第一Round時，先試自動波嘅「D波走天涯」，一路上波段提升順暢，油門敏捷，收放自如，但到試Sentronic半自動波時，卻有少許失望，當嘗試拖波掟彎時，奇怪地波箱反應唔強烈，可能因為避免突如其來嘅窒車都未定。此外，入彎、上斜、起步各方面完全超乎一架2,000c.c.房車表現，雖稱不上「大辣」，但這種微辣已勝過很多同級房車。
全新調校底盤 加強入彎準繩度
雖然玩拖波入彎有少少失望，但其經過重新調校過的底盤，卻又令我有另一感覺。底盤Tune過後變得更Sporty，尤其是入彎時更得心應手，入彎更準，唔會出現「大波Out」狼狽情形。懸掛、制動系統亦比舊版9-3更敏感，我可以放心以稍高速度入彎；每過一彎，穩定感令我不期然想再以更高速試另一個彎，睇嚟車廠真係花咗唔少心機去調校，效果不俗。
車廂小改 舒適行先
一向鍾意用「實而不華」形容紳寶汽車，每次試車，車廂鋪排永遠保持一貫作風，中控台永遠無多一粒無謂嘅按鈕，總之最基本嘅Function夠用就得。有人會覺得佢無新意，但我個人認為睇得順眼，覺得自然就得啦，搞咁多花臣咪盞睇得眼花，就算係改都只係小改，好似新版Vector咁，係咁意喺中控台包條磨砂銀邊，起眼得嚟又唔會面目全非，加埋全車真皮座椅，又係低調地玩吓TwoToneColour，唔誇張，望落自然又有個人風格。但係點改都好，紳寶依然保持舒服為先宗旨，新車一樣有承托力不俗嘅電動皮椅、天窗、闊落空間、主動式安全頭枕等優點，全都以舒服行先，貫徹歐洲車睇得又坐得宗旨。
Saab9-32.0TurboVector規格
引擎：1,998cc直4DOHCHighPressureTurbo
馬力：210bhp/5,500rpm
扭力：300Nm/2,500rpm
傳動：5前速Sentronic半自動波
車價：$335,000
車輛提供：合朗汽車（28383371）
抵讚
底盤經過調校，無論在操控感、入彎表現上都提升了不少，而且3字頭車價比以前4字頭吸引得多。
要彈
半自動波箱反應唔夠明確，尤其處於高轉低波時，反應不大甚至有點呆滯，有待改善。