武士復仇，十年未晚。城市大學遴選新校長工作進入直路，打入最後五強嘅兩名大熱門人選，揭開一段校園帝國反擊戰嘅序幕。
城大校長張信剛任期將於今年中屆滿，城大正喺度遴選校長接任人。有知情人士同八方報料，話早前被雜誌拍得有婚外情嘅城大副校長唐叔賢（外號城大謝賢），已經成功打入候任校長人選嘅最後五強位置，佢仲係新任城大校長嘅頂頭大熱。有部份身兼校長遴選委員會嘅校董，竟然好支持呢位懷疑包二奶嘅校長人選。不過，八方知道有啲人都好唔服，有學生仲揚言，如果唐四哥做到大學校長，佢哋會簽名要求罷免佢，一定會有行動咁話。
據知，城大新任校長係邊個，將會喺下月初公布。新任校長遴選小組，係由九名城大校董會人士組成，當中包括學生代表、教職員代表同校董會成員。八方聽聞，當年曾經因為同唐叔賢唔啱牙嘅城大前副校長高彥鳴，武士重來，佢都係城大候任校長熱門人選之一，當年佢係攞肥雞賠償離開城大，至今兩年左右，如果佢最後成功當選新任城大校長，佢要嘔番當年攞咗嘅肥雞補償畀城大，都咪話唔甘，不過人望高處，可以成為大學校長係光宗耀祖嘅事，少少錢唔算係乜嘢。
唐四哥搞到民怨沸騰
聽講，當年高彥鳴因為甚得學生同教職員民心，一直喺城大扶搖直上，點知校長張信剛突然搵咗個唐叔賢返嚟，高教授即刻失晒寵。唐四哥同高彥鳴嘅作風好唔同，四哥不單只同教職員冇乜嘢可以傾，仲要鐵腕一次過解僱咗唔少社區學院嘅教職員，搞到城大亂上加亂，民怨沸騰。
正所謂一山不能藏二虎，四哥遇着高彥鳴，最終高教授惟有退隱起來，食城大嘅肥雞餐，轉去科技大學化學系繼續教學，不過阿瑟王識貨，喺英雄落難之時，仲好睇重佢，邀請佢做教師工作委員會主席，負責研究教師工作壓力，畀佢一啲曝光機會。
一啲有心搞好城大嘅人，見唐四哥單緋聞就眼火爆，非常睇唔過眼，喺呢個多事之秋，高彥鳴回朝爭做城大校長，炒起戰況，熱鬧好多；知情人士估計，今次係高彥鳴一雪前恥嘅機會，好似帝國反擊戰咁，一旦上場，唐四哥一定冇啖好食，屆時又有好戲睇。《帝國反擊戰》下集係乜？《武士復仇》！