靚秘書Chiling見報紙報道，話06強積金（MPF）成績，又係港股基金跑贏，「敏妮，好彩股王A叫我強積金買晒港股基金，我睇報紙講，港股基金舊年升咗42%。雖然唔夠佢炒股賺咁多，但起碼好過咩保證基金，得5、6%，真係我買股票都贏得多個佢。」
芬佬投資多制肘
股王A話：「Chiling，你買股票不嬲都叻過好多基金經理㗎啦！」
「你咪笑我啦，都係多謝你成日醒啲好股畀我，等我儲番啲私己錢，今日請你飲tea。」
「唔係笑你㗎，唔係話啲基金經理眼光唔準，只係佢哋買股有時有好多制肘。」
近排贏錢贏到連股王A都眼紅嘅邱sir，忍唔住答嘴：「都唔明點解要迫我哋供強積金，你話管理MPF班基金經理投資叻就話啫，我買股賺得仲多過佢，我自己嘅錢我自己投資，退休時可能仲富貴呀！你話係咪吖敏妮？」
至少慳番行政費
「供MPF純粹係政府驚大家唔儲錢，老咗要靠政府養。我同意你投資買股嘅眼光，好過班基金經理，但我都贊成打工仔每月供款為退休做準備，不過，我認為唔應該限制我哋一定要供MPF，我月供股票咪仲高回報，驚供一隻股票唔能夠分散風險，唔啱政府要市民供盈富基金（2800）代替MPF啦！盈富由舊年初每單位15蚊，升到年尾20蚊，升咗三成四；雖然MPF裏面嘅港股基金舊年升四成二，但唔好唔記得未計基金認購費同管理費。」
邱sir話：「贊成！供盈富可以慳番一大筆行政費，你知啦，積金局班員工都要出糧吖嘛！」
股王A：「係呀！敏妮真係好提議，盈富係跟蹤恒生指數嘅基金，港股升，盈富跟住升，買盈富即係買恒指。報紙都報道啦，喺MPF裏面，表現最好嘅係港股基金；噚日你先講，大陸將香港當做金融轉口港，港股有大陸『射住』，點會衰，真係供盈富好過供MPF啦！」
邱sir好興奮咁話：「一於發起一人一信，要求政府摺埋強積金，轉供盈富基金！」