李家二少爺楷楷賣8號仔唔成呢單嘢，唔經唔覺過咗成個幾月，但啲手尾𠵱家先至浮現出嚟，好似工商及科技局下面嘅廣管局（BA），𠵱家企出嚟話，叫二少交代吓，佢檔now嘅股東架構，睇睇佢有冇犯咗跨媒體擁有權條例。
噚日立法會例會，李柱銘追問局長平叔王永平，有冇跟進同了解港澳辦主任廖暉介入單刁，呢單料係由極具江湖地位的FT（英國《金融時報》），響賣盤揭盅（舊年11月30號）前夕爆出嚟，咁局長點回應呢？
作狀跟進都懶講
平叔用咗約一版半A4紙書面回覆立會，基本上係圍繞住電訊購併條例，加一個簡單賣盤時間表，然後再補充話，響《基本法》同本地法律下面，任何商業活動、外來投資、私有財產都有明確保障（呢點二少應該唔同意）……咁即係點？
平叔個答案係：（一）我哋認為冇需要就有關報道做任何跟進；（二）我哋因此亦冇做任何評估……佢仲話自己個局一直有依法處理8號仔單嘢，咁呢單嘢中外傳媒都有勁多消息，局方梗係唔會每個報道都跟進……
政府點會入到位
話晒都叫做中方橫手干預香港商業活動，平叔居然連作狀話跟進都慳番，唔知佢係覺得FT冇料到，抑或嫌廖暉低級呢？
講番BA要問二少拎資料單嘢，官場小道權威消息話，二少啲律師仲多過政府，買咩都會幫佢精心部署，邊會咁容易畀到位政府入呢？