你哋一般平民百姓結婚，就話例牌菜「浮浮宮婚紗攝影套餐」，叻極咪格晒價搵人去拍番段video喺婚宴播，強迫親友睇你兩口子晒幸福兼附送骨痹，但係人哋豪門大宅結婚嘅派頭同玩法就唔同喇，非我哋凡夫俗子所能夢見。要名導！巨製！跨國！向全人類展覽幸福！大家有冇留意有個樓盤廣告，播咗一段時間喇，但播極都有長版本，裏面有情人終成眷屬，呢，又有世界小姐撐場，王子同公主快快樂樂生活下去呢，十足二流荷李活愛情文藝片情節，仲係唐季禮導演拍嘅㖭！咪就係比華利山別墅嘅廣告囉！聽聞恆地人人心裏明白，呢個係明賣樓、暗贈興嘅「愛的video」。四叔二公子早前結婚吖嘛，下屬醒目迎合，一舉兩得！有人問點解個廣告launch咗咁耐播極都有、又長，又播得密，明啦，新婚mood未完呀，豪門宴客可以食足百日等閒事啦，三分鐘版本播五次，都大約要250萬之嘛，香港畢菲特啲碎銀嚟啫！