北京兩會3月開鑼，民建聯嘅人大同政協代表今年創新猷，增設一個專用電郵[email protected]，畀市民表達意見，只要今日起至2月26日將意見掟入呢個依貓，或者可以直達中央。
不過，梗係唔係樣樣嘢都可以直上天庭，一啲敏感嘅政治議題，例如要普選或者要求釋放程翔等就未必可以處理到，身為港區人大嘅馬力解釋，有啲涉及一國兩制嘅問題，唔係咁適宜喺兩會提出，但都會諗諗辦法私底下幫大家跟進，叫大家放心。
今次北上嘅主打議題，就係內地孕婦來港產子，民建聯希望除咗本地入境處會審核內地孕婦資料外，內地出入境部門都可以幫幫手隔一隔，而且應該懲罰嗰啲違反一孩政策來港生多個嘅孕婦。唔知由佢哋開到聲，內地政府部門係咪更願意配合呢？