碧咸簽約LAGalaxy（洛杉磯銀河隊）五年，總薪酬二億五千萬美元，轟動歐洲體育界，特別係英國足球圈。不過喺美國嚟講，體育界天王巨星一年賺五千萬美元，雖然係好大數目，但並唔係前無古人。米高佐敦在黃金時代，一年都賺過四千五百萬美元。根據《福伯氏》雜誌估計，高球巨人老虎活士一年賺超過五千萬，另一位高球手PhilMickelson賺四千七百萬，籃球明星高比拜恩賺三千七百萬，奧尼爾賺三千萬，棒球手AlexRodriguez與美式足球四分衞TomBrady各賺二千九百萬。
碧咸之五千萬元報酬其實分開四大部份：（一）基本薪酬一千萬美元，以五十二周計，周薪約十萬英鎊，其實與朗尼、亨利等差唔多，並非十分突出；（二）與四大商戶贊助商摩托羅拉、百事可樂、吉列刀片、福士汽車嘅廣告贊助總值二千五百萬美元；（三）賣球衣營業收益一千萬美元；（四）洛杉磯銀河隊利潤分紅，估計有五百至一千萬美元。上述四項加起嚟，值五千至五千五百萬美元，所以有美國傳媒話碧咸身價高達二億七千五百萬美元（以五年計）。
實際上，碧咸未必分到咁多錢嘅，一年四千萬美元就一定有，你話碧咸得老友湯告魯斯提攜，上埋電視、拍埋電影，可能收入超過六、七千萬美元㖭，美國大型體育聯賽球隊，本來有薪酬上限（salarycap）。以足球大聯盟（MLS-MajorLeagueSoccer）而言，每隊最高可支付薪酬係一百九十萬美元，養最多一共二十八名球員，平均每人每年只得六萬七千八百五十七美元，雖然不愁生活，但同籃球員、棒球員、美式足球員、冰棍球員相比，實在少得可憐。去年「洛杉磯銀河隊」想斟碧咸，MLS特別通過一條新例，准許球會可與一位薪酬特高嘅球員簽約，毋須理會球隊薪酬上限。呢條新例被稱為TheBeckhamRule，既有先例，下一個被皇馬踢走，到美國球會搵銀嘅好可能會係朗拿度。