因一場世紀沙士而烏紗不保嘅前衞生福利及食物局局長楊永強，噚日以中文大學公共衞生學院講座教授身份，出席中大嘅講座活動，順便公布自己做咗由中大嘅公共衞生學院成立嘅醫療體系研究中心總監。呢個係繼葉劉成立匯賢智庫後，另一下台問責官員嘅政治平台，按楊醫生講法係檢討吓目前政府醫療制度有冇缺失，但係人都知，呢類團體有議政論政事份，分分鐘係政治參選嘅後援。
楊醫生話，𠵱家香港人力資源分配有啲出錯，好多公司都要求員工60歲退休，但其實好多人大過65歲都依然好健康，仍有工作能力，唔應該咁快退休。佢都係60有幾，咁講似有弦外之音。
楊醫生話，佢嘅中心主要進行三項研究，包括市民選用中醫中藥原因、人口老化問題，同點樣改善基層醫療及公立醫院門診服務。離開官場三年，楊醫生依然官仔骨骨，油光滿面，不過就清減咗，莫非係少咗應酬之故？