陳太嘅核心小組成立咗咁耐，噚日終於開咗個網站www.ansonchan.hk，畀市民發表意見，個網站暫時淨係得啲小組成員介紹。陳太就讚自己係「十分優秀的前高級公務員」，又話「陳太對香港的貢獻，不但深受香港市民的認同，也贏得國際的讚許」，「為穩定公務員隊伍及1997年香港順利過渡，作出舉足輕重的貢獻」。但小組其他成員嘅簡介，就平實好多、同陳太冇得比！
話時話，盛傳特首提名會喺2月14日開始，但係呢個日期就搞到民主派牙痛咁聲，湯家驊同八方講，每年農曆新年，好似佢哋法律界，一定一家大細去放長假，仲要一去就十幾日，若然情人節開始提名，幾日後就農曆年假，可能有支持民主派嘅選委，一早已經飛咗，玩到提名期結束先返，咁就大件事，你知民主派得百幾個選委，所以湯家驊要周圍通知支持者，為民主，今個年假唔好咁早走，又或者早幾日返香港，希望大家幫幫忙。