國內講土地增值稅講咗好耐，其實政策一早訂咗，只係欠咗啲細節，昨日突然有細節出台，國內地產股自然跌到一仆一碌，A股B股啲氣氛梗係唔得，照理港股氣氛都會差啲，但班好友都有兩度板斧，仲可以推高恒指36點。
港股昨日嘅波幅雖然窄，但好淡大戶埋身肉搏嘅場面就多咗，成交增加80億元，過埋下個禮拜期指就結算，恒指仲企喺上個月結算價差唔多水平，好淡都冇乜優勢，好友同淡友係時候搶番個有利陣地。
𠵱家仲未知開大定開細，不過，昨晚美國會公布PPI，美股應該會有炒作，近日花旗嗰邊唱緊聯儲局唔會咁快減息，但係就冇當壞消息炒，分析員話通脹繼續跌，經濟增長又好似冇想像中咁差喎，實情係咪咁就唔知，不過，有啲迹象搭定個台做場好戲，大企業就快公布業績，分析員睇得幾樂觀，聽到呢啲戲前對白，好友會放心好多。
個市嘅焦點集中飛機股，油價係咁跌，對沖基金玩完升玩跌，呢鋪「大茶飯」唔小嘢，冇咁快收手。其他可以諗嘅股份，都係花旗嗰邊煲緊嘅科技股。
聯想C輪4498：聯想（992）去年11月跌穿上升軌，1日嘅跌幅就可以送佢見條250日線，之後就橫行，上個月底逐啲推高，𠵱家就企咗喺10日線之上，平均線組合都靚番晒，睇嚟上次插落嚟都係「收貨格」，今次炒上應該可以延續之前升浪，可以睇3.80元到4元。聯想C輪4498昨收33仙，槓桿率10.1倍（有效4.8倍），對沖值0.477，正股升到4元，4498應該見7毫子，就算升到3.80元，都有8成升幅，現價買入，正股跌穿3.17元止蝕。
俊樺