對於紐約證交所話最快3月推出網上即時報價試驗計劃，並且會以每月10萬銀美金，向各網站提供即時交易報價，Google同埋CNBC都回應指，會免費向網民提供呢個服務，香港幾個網上討論區都有網民展開熱烈討論，77%以上網民贊成港交所（388）學人哋美國同大陸提供免費午餐；14.4%反對，話免費會令用量劇增，系統未必可以支撐得到；8.2%就冇意見。
全球最慢遲足一個鐘
網友風雨星雲喺《香港討論區》話：「點解港交所冇免費即時報價？仲話係國際金融中心。」jaychan88講：「香港咩都係得個名，又話係國際金融中心，完全冇配套。」BAN47加把口，「如果好似大利市機咁，能夠提供詳盡嘅股價資訊，要畀錢都合理，但港交所連最基本嘅免費即時報價都冇，實在唔合理。」
Allan話：「香港係全球免費報價最遲嘅金融中心！」仲將Yahoo列出各地交易所嘅時差鋪上討論區，一般嘅時差都係10至30分鐘，港交所竟然要1小時！相反滬、深交易所就提供免費即時報價。
hung7kun建議：「如果港交所能夠提供網上即時報價，可以有助股民盡快作出買賣決定。到時買賣交易多咗，港交所亦會水漲船高，收入自然更豐厚啦，咁咪可以達致雙贏囉！」
為留客股票行貼錢做
唔單止網民一面倒，連股票行亦同交易所傾過，因為𠵱家佢哋為留客，部份如耀才咁，每個月做夠30個trade就送即時報價，等於每個客津貼成300幾銀；但交易所回覆話好難免費，事關要將呢筆收入不斷做系統更新喎。
港交所發言人稱：「唔使錢就冇可能，但我哋已答應會全面檢討各項收費，以確保交易所嘅競爭力。至於縮短免費報價時差就正在考慮之中，應該唔會太耐就有公布，因為呢個改變，技術上並唔需要做太多改動。」
既然唔使改太多嘢，咁點解唔早啲做呢？激死！