隨着樓市降溫，美國業主飽受樓價下跌之苦，加上貧富懸殊問題愈嚟愈嚴重，又有愈嚟愈多職位外判到海外，唔少人失業兼冇錢交租，「租霸」橫行嘅情況有日漸猖獗嘅迹象，所以做業主有時真係好慘。
adela76喺《MSN討論區》話：「我個租客30幾年來都準時交租，但舊年夏天開始失業，由11月起一直欠租。我每次向佢追租時，佢都話過幾日就有租交，但到時佢又唔交，仲霸住間屋賴死唔走，令我好激氣。唔知好唔好請『驅逐租客服務公司』趕佢走？」
Connemara講，可以搵個熟悉租務嘅律師幫手，不過喺美國，租客嘅權利似乎大過業主，一旦入咗伙就好難趕佢走。sh81講，業主向租客下逐客令後，層樓就已經凍過水，因為個租霸會好激動，仲會大肆破壞室內嘅裝修同家具。
貼錢送瘟神
業主ups-and-downs話：「我個住客冇交租幾個月，如果透過法律程序收樓，可能需時兩三個月，呢段時間又冇租收，所以我把心一橫，決定貼錢畀佢走，佢收咗300美元（約2340港元）後先至肯搬走。後來我間屋好快就租出。」不過，frrrpants批評呢種做法只會鼓勵租客欠租。
AlaAnnie講，佢亦受過租霸滋擾，所以上網睇吓啲租務法例，同埋有關收樓程序嘅資料，然後按照法律程序收樓，原來收費唔算貴，程序亦好簡單。sweetnepenthe就推介一個業主網站（網址：mrlandlord.com，圖），可以解答各種問題。