燒嘢食通常都係男仔開爐，女仔因為怕污糟，所以好多都唔識開爐。前日我同欣欣幾個女仔約埋肥仔倪社一齊去清水灣燒嘢食，點知佢甩底。我哋惟有繼續去坑口吉之島買雞翼、豬扒啦，其間見到一包「一點即着．環保燒烤炭磚」，10蚊一包，包裝好似即食麵咁，入面有一嚿手掌咁大嘅炭。
貌似蓮藕 夠燒兩粒鐘
我哋去到燒烤場拆開包炭，嚿炭好似蓮藕咁有好多洞，只要點着附有嘅木條，放入中間個洞，連炭精都唔使，幾分鐘成嚿炭通紅着火，我哋即刻高唱：「燒雞翼，我鍾意食……」呢嚿炭可以燒成兩個鐘㗎。
我哋都知道倪社想追欣欣，所以一邊燒烤，一邊教欣欣：「呢啲男仔，張愛玲話齋，一不能結婚，二不能贍養，仲放飛機㖭，真係嚿炭都好過佢。」講開嚿炭，呢嚿炭其實主要係由無煙煤同木炭製成，城大生物及化學系副教授張漢揚話，將煤同炭一齊燒都冇問題，但記得要喺通風環境燒喎。
逢周一至周四刊出