升職嗰個未必係最叻嗰個，你做得啱，你老闆話唔啱，一樣冇得撈！以上係九型人格專家兼商界女強人梁安妮講嘅，應用喺特首選舉上一樣得。佢噚日分析咗兩個特首候選人嘅人格，勁讚梁家傑係一號完美型人格，從佢條一絲不苟嘅袋巾同「梳到成個煲咁」嘅頭，睇得出佢好講原則，重視操守，為咗理想會犧牲小我，好似印度聖雄甘地就係咁嘅人。安妮建議梁大狀唔好黑口黑面要笑多啲，雖然對爭櫈仔冇乜幫助，但可以贏多啲民心。
至於煲呔就係六號忠誠型人格，好勤力，又聽老細話，乜都但求穩陣，冇出錯、唔好𤓓，最大恐懼係失去依靠，呢種人遇到壓力就會變得怯懦腳軟。聽教聽家長話，照咁睇的確fit晒阿爺要求，唔知中央係咪一早搵過類似龍師傅嘅高人指點，算過煲呔係乜嘢人格，先搵佢做特首呢。
話時話，煲呔近日爭取時間行街拉關係，噚日就去咗南區探民情，佢去埋海洋公園參觀，公園方面向佢簡介即將推出嘅全新設施。煲呔又去咗大熊貓園，探望隨時冇得留低嘅大熊貓「安安」同「佳佳」，大打溫情牌。