投資者買股票梗係想賺錢，但原來除咗搵錢，仲有其他原因令佢哋跌落股海，網友RK喺《現金流投資論壇》做咗個調查，問「大家為咩買股票？」，有15%網友話為咗錢，有錢可以買到自由；10%視炒股為一場鬥智鬥力嘅遊戲；4%因為一開始投資就贏錢，覺得自己係股市天才，所以繼續玩落去；但超過七成網友係因為其他嘅原因（見圖）。
鍊贏大戶好玩刺激
原來唔少網友都係早幾年銀行存款勁低息下，先至開始玩股票，靈子好慘咁話「被迫」跳入股海，「一向幫阿媽管錢，穩穩陣陣做開定期，後來見咁低息，先至進取吓買股。」Luckystar亦係咁，「定期利息低無可低，谷鬼氣下將錢買晒股票，𠵱家中晒毒走唔甩，將來嘅下場？一係就大賺特賺，一係就死得好慘。」
網友Cheers好老實咁講：「當然係要賺錢啦！同埋睇吓自己嘅眼光準唔準，希望喺最快時間賺到好多嘅錢，為未來做好準備。」Lightlight亦話：「我都好現實㗎，為錢！有錢有自由，買鍾意嘅嘢，幫吓人，仲可以考吓眼光，最過癮係可以同高手過吓招。」Hihi大表贊成，「能夠睇穿大戶戰術而贏錢係好開心㗎！股票比世上絕大部份嘅嘢都好玩刺激。」
Belstdt當初玩股票係出於貪得意，「個friend叫我學吓，睇吓可唔可以資本增值，就用少少錢落場陪佢學吓嘢，就係咁一玩就玩咗幾年。」Blue就話：「我讀書同做嘢都同財務投資有關，玩股票係好自然嘅事，加上風險管理係我強項。」Crazyjan認為玩股係要將自己嘅理財潛能發揮到淋漓盡致，「投資係一門學問，可以鍛煉自己思維同心理質素，當然賺錢亦係主因。」