隔晚油價「喪跌」，因為中東佬唔願開緊急會議傾減產，油價想升都幾難。
油價下跌受惠股始終都係飛機股，東航（670）升13%，南航（1055）升8%，國航（753）升7%。其實石油受惠股仲有工業股，玩具商彩星集團（635）再升5%，造BB用品嘅隆成（1225）升13%。其實講到用得石油原材料最多嘅，點都係造鞋商，新灃（1223）值得優先關注。
新灃主要為Reebok生產運動鞋，去年adidas收購Reebok，對定單數量有正面作用，雖有一主要客戶財務有問題而停接定單，惟中期營業額只跌6%，毛利率維持22.6%，在去年油價仍高企情況下，反映公司有透過其他方法控制成本，現遇上油價急跌，毛利率照計會進一步改善。
01年新灃收購當時申請破產保護嘅Converse品牌，兩年後沽出大賺一筆，並已成為公司製造業務主要客戶，反映公司頗有眼光。現正積極進軍內地零售業，具08年北京奧運概念。同樣賣體育用品，李寧（2331）往績PE高達77倍都有得炒，新灃往績僅6倍，兼無負債淨持現金，無理由落後同業咁多。睇多隻可以留意埋永恩國際（210），噚日大摩調高永恩盈利預測及目標價，睇9.20元，現位有一成半上升空間。
勞氏唞完又再嚟過
勞氏環保（309）呢隻冷門股去年11月平地一聲雷，股價兩個交易日急升一倍，經紀話呢類怪雞股反而容易吸引散戶上車。呢隻神奇股升到1.70元水平橫行咗兩個零月之後，噚日又再嚟料，升咗16%。該公司去年宣布組成合營發展內地醫療廢物處理業務，公司估計投資回報率逾50%，兩年內可帶來近8000萬元收入云云，未來收入目前仍是未知之數，但由於貨源集中，容易炒上之餘，不過也有一定風險存在，跟炒要嚴守止蝕位。
歐陽風