雖然近年銀行搶走證券行唔少客仔，但股市暢旺，證券行仍然好景，以最平網上佣金收費招徠嘅耀才證券咁，經過3年發展，已經站穩陣腳，啱啱仲宣布斥資9000萬蚊，買咗中環永安集團大廈一層萬六呎樓面做新總部。
加15巴仙人工
耀才總經理陳啓峰話畀華華知，除咗搬去大啲嘅寫字樓，仲有一大喜訊畀員工，就係平均加咗15巴仙人工，同埋發放20個月花紅，希望大家拍硬檔再做好啲，事關佢哋公司正籌備上市，同埋引入策略股東，𠵱家正搵緊保薦人，爭取最快明年成事喎。難怪陳啓峰之前曾經同華華講，「做（新股）孖展都做到死，根本連休息時間都唔夠，仲邊有時間消費！」
港股舊年令散戶賺唔少，股票經紀自然豬籠入水，所以股票行派豐厚花紅嘅消息，今年一個接一個。國際級證券行如高盛舊年年尾就宣布，每名員工平均獲發480萬花紅，本港表現好嘅高層亦有超過30個月花紅。另外，摩根士丹利就有傳，員工獲得100個月月薪嘅花紅。
至於華資證券行亦唔輸蝕，恒豐證券之前話今年員工花紅平均係3至4個月糧，輝立證券交易董事黃瑋傑更加透露，舊年員工平均加薪10%，個別傑出員工今年花紅高達10個月糧。
[email protected]