天水圍、東涌嘅300個小朋友，月底有機會免費「出城」！銅鑼灣「地王」希慎贊助嘅灣仔節「城市。綠色。音樂會」，會喺1月28日封咗成條希慎道同新寧道嚟舉行。希慎CEO利子厚話希望住得遠嘅細路仔都可以一齊玩，感受文化薈萃嘅氣氛。佢哋會整5000個吹氣樹葉咕𠱸掛滿兩旁大廈，亦預留畀遊人周街坐，但相信有萬五人參觀，咕𠱸肯定唔夠派。
嗰日除咗非洲鼓、建築師夾band，同埋環運局長廖秀冬細仔蕭偉中嘅歐陸四重奏，壓軸係歌手劉雅麗唱《春天》音樂劇嘅歌，戲碼強勁。有份協辦嘅中英劇團藝術總監古天農話，人哋講天水圍好多「701部隊」，即係阿爸70歲，囝囝得1歲，啲團體入去搞活動，不妨諗吓唱多啲和諧嘅粵劇、普通話歌，就算唱英文歌doremi，亦可考慮派歌詞，等多啲人一齊參與，總之每個社區活動，都應該有自己嘅特色。