地產部落:美孚炒家累街坊

地產部落:美孚炒家累街坊

老牌屋苑荔枝角美孚新邨今個月人氣急升,事緣有個豪客喺短短幾個禮拜內,豪擲逾6700萬元掃入19個連租約單位,帶挈美孚今個月成交量飆升,截至16日,錄得超過70宗買賣,拋離一眾藍籌屋苑。估唔到呢單消息嘅威力橫掃到荃灣區,喺《香港討論區》入面,網友TommyZZ狂呻:「我俾美孚條炒友累死!」
佢話:「我喺荃灣搵樓都成半年,幾難得個零星期前先睇啱,更難得係個業主開價都算合理,已到埋牙階段,仲去埋銀行估價準備畀錢落定,點知噚晚個經紀突然打電話嚟,游說我再去青衣呀、東涌呀睇吓盤先做決定,我心知不妙,最後個經紀終於話,業主見到掃美孚19個單位嗰位仁兄咁出位,即刻心雄反價。唉!又唔知要等幾耐先再搵到個啱心水嘅單位啦!」
TommyZZ都算唔好彩,其實個市靜咗咁耐,荃灣又有大量勁蝕新盤拖累,佢搵啱貨準備入市,竟然會遇到外圍個市旺番咁多,俾業主反價。即使啱啱有個沙士價新盤HCube出嚟,但係呢個盤單位咁少,冇指標作用;加上大型屋苑二手交投真係旺咗,如果業主唔係急住賣,想好似舊年咁大幅壓價認真唔易。
不過,好多網友睇完佢嘅經歷,都覺得冇乜大不了。hclihcli安慰佢話:「慢慢再搵啦!有錢唔怕冇樓買。」philipben和應:「買唔到呢個仲有好多其他嘛,又冇蝕錢,唔使咁灰喎!」fakeisum抵死咁話:「唔使死,放心,買樓同搵老婆、老公一樣,都要講緣份。」

業主收窄議價幅度

有啲網友就認為TommyZZ反應過激,又肥又矮話:「咁又唔使死咁嚴重。」looklook334:「買唔到就租,租唔到同父母住,都不至於累死你呀!」petitsang:「只係買唔成樓,又冇俾人呃,咁你都要死?」
究竟美孚豪客係咪真係咁勁,托起咗個市?中原美孚分行經理鄧百垣話,大手掃貨消息一出,放緊盤嘅美孚業主,即時收窄議價幅度,由5至10%收窄到2至3%,但係成交量冇放緩到,𠵱家個呎價由上個月3000蚊,升咗6.7%到3200蚊。