昨日收到料，話麗新發展（488）短期內會有大動作，股價初步上升目標可挨近0.40元。
消息話麗展近期與大行同基金間的活動頗為頻繁，時機一成熟，股價就會飛升。麗展去年4月底曾見高價0.455元，芬佬有信心，今年內股價可大升，向0.50元進發。
不過，芬佬就提醒一句，話呢隻股票唔易玩，時機未成熟，唔係咁易郁，但一埋位時，要升幾多就有幾多。就以噚日為例，全日就只係見瑞信一間大行係咁沽，麗展全日成交3500多萬股，瑞信起碼沽咗大半有多，大家不妨昅實，一唔見瑞信個沽盤，就要密切留意。
睇走勢，麗展呢輪由低位兜番上，由去年12月開始，形成一個圓底收集區，噚日就係受制圓底頂部（0.325元）同50日線（0.321元）阻力，但一破位而上，照度上去，目標指向0.385元。
麗展重整後，現時發行股數141.6億股，市值約44億元，但旗下投資物業每年的租金收入都已有2億多元，另外酒店收入約1.5億元，再加上應佔聯營公司收入，PE係單位數字，06年度（7月年結），連同重估物業增值獲利就達5.12億元，每股4仙，往績PE7.8倍。
現年度，租金收入上升，酒店同飲食經營亦比前更好景，估計經營溢利會有20至30%上升。集團旗下的麗嘉酒店和大華酒店係以折舊入賬，未有反映實值。
改建麗嘉傳快落實
麗嘉酒店改建寫字樓，有消息指好快會落實，重建完成後，每年收益可比現時倍增。麗嘉酒店地盤1.5萬方呎，可建樓面面積22.5萬方呎，現時中區平均呎租80元，重建後商廈每年租金收入便有2億元。
仲有，重建麗嘉商廈，估需動用6億元，以每方呎1.2萬元計，整個商廈已值27億元，係成間公司市值的60%。
另外，麗展佔34.83%權益的豐德麗（571），在澳門發展的電視城項目，又係「雷聲大，雨點亦大」，整個項目樓面360萬方呎，並正與當局商討，將樓面增加至600萬方呎。
郭兆誠