各位打工仔，唔知你哋有冇試過同自己老細打賭某一樣嘢？我求大俠雖然係浪人一個唔使打工，但斷估你哋都唔夠膽同老細對賭。不過近期紅爆嘅曼聯中場基斯坦奴朗拿度（C朗）佢敢，C朗同領隊費格遜喺季前打賭，話如果佢今季聯賽入夠15球，就可以贏老細400鎊（約6,100港元）；C朗仲好寸咁話：「費Sir，你輸硬畀我，速磅！」
入多兩球即達標
其實C朗對上兩季都曾經同費Sir對賭過，不過兩次都輸；今季佢兩個賭開有鋪癮，於是又再打賭，盤口都係C朗喺聯賽入15球。我求大俠八到原本費Sir開價只係100鎊，但C朗就信心爆棚話要夠400鎊先肯制；同老細討價還價？C朗你真係夠薑！
結果，𠵱家C朗喺英超已經入咗13球，仲差兩球佢就可以贏費Sir錢。嚟緊周日曼聯將作客阿仙奴，呢啲大戰隨時又會大手交易，話唔埋C朗會梅開二度之餘，又幫到球隊全取3分都未定。
不過話時話，如果C朗真係繼續有貨賣，幫曼聯砌低死敵阿仙奴嘅話，費Sir又點會將區區400鎊放在眼內呀，佢都唔知幾想C朗入多幾粒啦！
「我求大俠覺得費Sir呢個老細幾識刺激球員士氣，400鎊雖然係小數目，不過作用真係大。起碼C朗為啖氣落場又肉緊啲，表現又好咗吖！。」