南華早報集團係西報嘅大哥大，外間一般只識得佢哋出版嗰份《米報》，未必知原來佢哋都有幫阿媽嘉里建設出版雜誌，就係嘉里送畀客戶同旗下住客嘅《臻善譜》。呢本雜誌南早印一期要收成60.7萬，都幾和味㗎。
睇番嘉里嘅網頁，呢本雜誌已經出咗七期，內容雖然走唔甩介紹旗下嘅物業，好似九龍灣巨無霸商場MegaBox，同埋何文田豪宅灝畋峰，但每期都有一啲輕鬆同有趣味性嘅文章，唔係一味硬銷。不過，每期印幾多本就冇披露。
肥水不流別人田
另外，原來嘉里仲有出版一份提供九龍灣區實用資訊嘅刊物《企業焦點》，舊年1月創刊，暫時出咗3期，估計應該都係畀南早印，因為肥水不流別人田嘛。
嘉里大股東郭氏家族嘅生意瓣數多多，若果啲宣傳刊物都畀晒南早印，條數都幾襟計。