香港50年代影壇大美人夏夢（原名楊濛）嘅丈夫林葆誠本月一日於港安醫院病逝，享年83歲。
長眠柴灣墳場
噚日林家喺赤柱聖亞納天主教堂舉行安所彌撒，金庸夫婦、唐英年母親唐尤淑圻、孫秉樞伉儷、邱德根老婆同陳自強等往致哀。夏夢就撐住枴杖，喺家人陪同下送夫君最後一程，雖然佢行動唔係咁方便，但精神算唔錯，喺鏡頭前一直表現得好平靜。
不過安所彌撒唔多歡迎傳媒嚟採訪，因林家想低調啲。做完彌撒，林葆誠嘅遺體就送去柴灣天主教墳場安葬。夏夢21歲就嫁畀從商嘅林葆誠，聽聞當年金庸對已為人婦嘅夏夢好傾慕，只可惜兩人有緣無份，只能做好朋友，因為夏夢好愛佢老公。
