英國《金融時報》噚日話，花旗集團本周要做重要決定，就係丟咗紅色遮仔logo（圖），但留番個遮柄，集團個英文名，亦會由Citigroup縮短為Citi。
紅色遮仔logo，係花旗前主席SandyWeill嘅至愛，當中仲有段古。個logo原先屬於保險公司Travelers，Weill喺93年買入Travelers大部份股票，仲喺前一年對個logo做過研究，發現個logo代表金融界唯一最可信咁解，於是攞埋嚟用。
去年中上任嘅新主席ChuckPrince，對於換logo戰戰兢兢，擔心人哋以為佢想同前主席劃清界線，所以淨係諗丟唔丟咗把遮，都諗咗成年時間。報道仲話，把遮喺亞洲部份市場其實唔係咁適用，但就冇進一步解釋，唔通紅色遮對於一啲人嚟講好邪？