雖然愈來愈多女性炒股，不過據《香港討論區》嘅調查，男性佔散戶比率仍高近四分三，其中未婚男佔61%、已婚男佔13%（圖），但有網友指數字唔可靠，因為網上炒股大部份係後生仔女，上咗年紀嘅多數去股票行，而且中年女性一般喺銀行股票機前㩒掣而唔上網，所以唔可以作準。
炒股貴乎賺錢，雖然股神畢菲特、索羅斯及「香港畢菲特」李兆基都係男性，不過網友對女性投資股票持正面態度，認為女仔炒股叻過男仔。
喺《天統》網，網友指女性對價錢天生有第六感，比男性多一份細心、謹慎，一旦認為準確就義無反顧；而大多數男性就比較愛面子、好衝動，儘管有時較女性更理性，但理性得嚟有啲盲目自信，而且死不認輸，往往會放過咗啲稍縱即逝嘅機會。
網友AMY話：「男人呢種動物最大弱點係『贏錢大大聲，輸錢暗啞抵』，佢哋唔想承認投資有失誤，往往誇大自己炒股成績。講到好似炒股專家，隻隻股都『講得幾嘴』。」
太自信唔肯止蝕
《香港168論壇》agon亦講到，男性一般較女性相信自己嘅理財能力，當投資項目「潛水」時，亦傾向繼續「坐艇」，堅信自己嘅投資眼光，不願止蝕。不過，女仔細心之餘有「慢半拍」特點，做決定時，經常因諗太耐而錯失投資良機，風險承受能力亦唔及男性。
去年英國財經網站《DigitalLook》調查顯示，女性投資成績比男性好，主要原因係女性傾向選擇平衡嘅投資組合，而唔係風險高嘅股票。10萬個投資組合中，女性喺股票投資嘅平均回報率係17%，男性只得11%。總結網友評論，假如買賣股票時，老公肯多聽老婆大人嘅分析、男仔聽吓女友意見，可能就係理性與感性最珠聯璧合的配撘。