相信各位電腦迷都好忙碌，事關積聚咗一季嘅購買力，又係爆發嘅時間，你哋響電腦節又買咗咩嘢呢？綜合網友意見，覺得最抵買一般都係LCD芒同記憶卡，不過原來要買到筍嘢，都真係要幾忍得手，好似有網友就話第一日去買三星LCD芒，$1,990仲送隻512MB記憶手指，誰知另一網友就爆料，話：「我第二日去，$1,890有交易，仲送埋華仔CD兼$100Nike券㖭！」
又有網友笑笑口咁話，今年電腦節最有Feel。起初睇到都唔明佢意思，原來今年電腦節仍然喺黃金對出馬路露天舉行，電力一向都要由大廈引出街外使用，今年唔知邊度出問題，據聞有日10分鐘內就停咗10次電，仲要喺夜晚，搞到成條街好似夜冷檔咁，都幾好Feel㗎！
電腦節向來係供代理、舖頭喺新年前清貨，價錢好似平咗咁，不過世界難撈，平時有行開腦場，可能發覺唔係平咁多，只係搞吓聲勢，吸引電腦迷搞旺個場。
所以，唔少攤位搵靚女Promoter助陣，Shopping兼睇女，又真係唔錯嘅節目。
記者、攝影：許福合