港股前日升400幾點，昨日跌番40點，睇嚟係大漲小回，好健康，但係啲成交係咁縮，唔知搞邊科，但有啲陰陰凍，好似游冬泳感覺到有暗湧咁，睇圖同成交，加埋恒指股嘅買賣手法陰陽怪氣，唔理炒上定炒落，輸個邊多數會屍橫遍野，大家都係睇定啲先落手，不過，既然唔係大上就係大落，最好都係做定兩手準備。
昨晚美股開番，點睇？睇好啲，因為之前科技股喺場外做得幾好，如果睇吓納指幅圖有幾靚，就知道美股嗰邊嘅科技股會繼續炒，大家有冇留意到近期港股有好多隻科技股已經郁吓郁吓，大多數都係二三線股，𠵱家成交唔算好多，唔係咁起眼，但遲啲炒起上嚟可以好癲，不過大家都知道，炒呢類股風險同回報機會都好大，一定要量力而為。概念呢樣嘢，炒起嚟可以噏得好高價，炒落嘅時候就noeyesee，大家都受過教訓，應該好明白。
個市等緊突破，成交縮，引伸波幅跌緊，揀窩輪要格外小心，唔係正股冇乜變，隻輪就不明不白唔見咗一截就好唔抵。新地（016）同恒生（011）繼續有好表現，昨日一齊出現「十字星」現整固，相關C輪推高獲利位繼續揸。
中電信C輪6080：中電信（728）昨收3.94元，升3.6%，早排喺高位出現支大陰燭，嚇到班炒家好驚，跟住就下試50日線，昨日成交大番好多，一跳上去就企番喺10日同20日線上面，睇嚟短線可以試4.30元，破位睇4.50元。
中電信C輪6080昨收35.5仙，槓桿率11.1倍（有效5.5倍），對沖值0.52，正股升上4.30元，6080應該升到55仙，正股上試4.50元，隻輪會見到68仙，呢個價買，正股跌穿3.78元止蝕。
俊樺