成班練馬師馬主飛去澳洲參加「神奇百萬二○○七周歲馬拍賣會」，順便到昆士蘭黃金海岸嘆吓陽光海灘。近年澳洲經濟好景，中東石油好景，香港股市好景，啲純種馬搶到好貴好貴，馬主N喺去年十一月同老友睇中一隻「丹山」最後子嗣（丹山Danehill已經死咗），三歲愛爾蘭馬，馬主開價三十五萬美元，冇價減，馬主N諗咗一個禮拜，話OK，點知愛爾蘭練馬師叫馬主唔好賣，拎咗去「新市場」拍賣會。馬主N搵代理人到場舉手，舉到三十五萬美元就停手，結果畀杜拜酋長麥通以五十幾萬美元買咗。凡係你睇中嘅馬而麥通酋長亦鍾意，冇運行咯。
馬主N臨去澳洲買馬之時，叫左丁山預留時間欣賞二月二十七日（年初十，星期二）晚上喺新光戲院嘅粵劇，由「鳴芝聲劇團」演出「龍馬精神賀新春」，加名人粵曲演唱，為RDA（香港傷健策騎協會）準備○八奧運馬術賽籌款。「鳴芝聲劇團」嘅台柱係蓋鳴暉、阮兆輝。左丁山好多年冇睇粵劇咯，原來新光戲院每年都有大戲演出，今年正月初五（二月二十二日）至正月十六（三月五日），一槌鑼鼓十四日，日日有「鳴芝聲」演出，其中有二晚係籌款演出，分別為「地鐵商場」香港公益金、RDA與妙法寺。佛教徒捐款素來不甘後人，聽講妙法寺啲善信有十萬元、十萬元咁贊助，聲勢墟冚。RDA呢？有唔少馬主掏腰包支持，最貴嘅五千元戲票最受歡迎，其他二千、一千蚊嘅飛，就靠RDA啲理事去推銷，當然亦有普通門票在新光戲院及電腦售票處出售。
左丁山幾乎唔記得新光戲院喺邊度。但都知道阮兆輝曾有粵劇神童之稱，蓋鳴暉就係當今最有人氣嘅文武生（女扮男）。為咗香港學習騎馬嘅傷健人士，左丁山一於到時到新光睇「鳴芝聲」。香港接手主辦○八年奧運馬術賽之後，香港馬術界人士，無論健康正常嘅還是傷殘嘅，為咗香港面子，點都要撲水嚟辦得好好睇睇，馬圈人士比較少出力，但如果能夠樂於捐錢，向來冇乜收入嘅馬術界會好多謝。