𠵱家內地經濟起飛，人民幣愈嚟愈值錢，個個都話「人仔」長升長有，網友ecchecch就喺《香港地產城》討論版開題，研究港紙平過人仔，對本港樓市有冇影響，「同胞會嚟掃貨嗎？唔係豪宅，而係中型甚至中小型物業喎……希望二手都可以受惠。」boboo就覺得呢個情況暫時未係好明顯，但會係一個趨勢，「大陸大富豪掃豪宅，大陸小富豪掃中小型物業，本港小市民就返內地買樓。」
影響樓價事大
曾經有地產界人士講過，近年好多內地商人都鍾意喺香港買豪宅，出手仲好闊綽，有時買嚟當收藏品，唔會自住。至於係邊個，地產界人士話唔方便畫出腸，大家當係閒話家常就算。
啲有錢同胞大大嚿錢抬落嚟香港買樓，帶動本港樓市，聽落似乎幾唔錯；不過，網友何偉濤就擔心，同胞除咗帶錢落嚟，仲會帶埋啲地道習慣嚟香港，「大家幻想一下，當大陸同胞進駐貝沙灣會所會有乜後果？乜嘢歐陸feel、法蘭西帝國品味，都會即刻變味……」
佢仲話班同胞真係大舉進駐嘅話，可能會影響樓價㖭，「一班喺會所煲煙、講粗口、痞地下嘅業主，真係會影響樓價。你係香港買家，見到都唔鍾意喇。」544319話見到咁嘅情況，認真該煨，「如果我畀成千萬買層樓諗住住得舒舒服服，但一落會所見到啲同胞嘅壯舉，就真係揼心口囉。都唔想歧視佢哋，但有錢唔係最重要，最重要係培養吓品格。」
十幾廿年前返大陸，100蚊港紙只係換得幾十蚊外滙券，但係港紙仍然極之受同胞歡迎，因為當年有啲物資，只可以用港紙或者外滙券買到。𠵱家人仔比港幣更有吸引力，某程度上都係多得內地經濟火速發展，以地產商轉得咁快嘅商業頭腦，睇嚟好快可以直接用人民幣買香港樓，或者會有更多優待內地人士嘅賣樓花招。