內地呢塊肥田，試問邊個唔想要，唔少老外企業來港，都係志不在此而在彼，好似喺前宗主國嚟嘅標準人壽，噚日宣布重新拓展香港業務，除咗保險，仲會提供埋財富管理服務，但係，睇嚟佢哋同一眾老外企業一樣，志不在香港，內地先係真正目標。
記者追問喺香港及內地嘅發展目標，標準人壽亞洲行政總裁艾倫．愛廸智只係話，對香港發展充滿信心，未來繼續擴展分銷網絡咁話。佢哋喺大陸嘅宏圖大計非常清晰，集團營運總監MarciaCampbell話：「內地業務每年將以倍數增長，目標喺08至09年，將旗下合資公司恒安標準人壽發展成國內五大保險公司之一。」
標準人壽投資行政總裁KeithSkeoch就希望，以香港作為樞紐，為內地財富管理業務提供支援。總之今次拉弓放箭，目標係潛力無限嘅神州大地，而非彈丸之地嘅香港。