九龍城泰國人多，泰式食店自然自成一國。不過發現位於電氣道的EosThai，外表看上去跟Cafe差不多，和泰菜有點格格不入。店中其中一個特色菜－泰東北咖喱雞絲麵，睇落平平無奇，原來玩層層叠大有亁坤，有齊軟及硬兩種質感的麵，和店舖本身一樣有驚喜。
文：瑜三文
攝影︰譚盈傑
泰東北咖喱雞絲麵$52
食前要將所有配料攪拌均勻，味道辣中帶甜，腍身的粗麵配上脆炸的幼麵，口感似拌粥食的脆片。
第１層辣
用來自泰國的香料煮成咖喱汁和自家製的辣汁。
第2層軟
軟韌度適中的粗麵。
第３層脆硬
脆炸幼生麵，食落卜卜脆。
第4層香
配料如雞絲、洋葱、芫荽、辣椒仔，混埋一齊食更加香口。
電氣道食肆林立，潮州粉麵、西式Cafe、茶餐廳應有盡有，新開業不久的EosThai格局清新，反而和出面車來車往的電氣道有點格格不入。甫入店中，一邊座位是舒適的黑皮梳化，設計和一般泰國餐廳不甚相同。全店的侍應清一色是地道泰國人，純正廣東話問一句︰「小姐想叫乜食？」有禮態度親切。
泰廚同鄉大搞創意
其中一個菜式「泰東北咖喱雞絲麵」，是店中的泰廚Jenny和一班同鄉合力炮製。上菜時平平無奇，面層有雞絲和洋葱等配料，下面就是麵底。Jenny笑笑口話︰「你食一啖試試！」筷子夾起原來內有亁坤，底下還有一層煮腍的粗麵和咖喱醬，撈一撈食得！如此的撈麵在一般的泰菜店子比較少見，是因為有見一般撈麵撈到悶，就和姊妹們合力加入新元素，點知一做之下效果好突出，立即成為店中其中一個極受歡迎嘅菜式。
炭燒是日鮮魚$38
鮮魚日日不同，黑鯽魚是其中一種，劏好魚後將香茅、薑等填入魚肚，再以炭燒方法燒香。
海鮮粉絲沙律$48
酸酸辣辣的沙律，混入了自家製的醬料，新鮮海鮮包括蝦、魷魚等，即撈即煮味鮮甜。
南瓜基圍蝦焗飯$78
新鮮原隻基圍蝦連殼焗30分鐘，飯味會更香更鮮，配上香口小食︰腰果、芋頭、肉鬆，整個菜式看上去更加豐富。
食神評級（5粒★為滿分）
價錢︰★★★★
環境︰★★★
味道︰★★★★
服務︰★★★★
讚
食物味道不俗，菜式選擇多而且口味夠地道。
彈
店子小，在人多的情況下可能要搭枱，食物亦需要較多時間準備，出菜亦較慢。
搵食攻略
EosThai（35792486）
地址︰北角電氣道39號地下
營業時間︰10am-11:30pm
座位︰約30個
交通︰地鐵天后站A2出口，步行約1分鐘。
