網民「meme0303」有次遇上一名八卦警員，警員截查身份證之餘，又要搜查其隨身物品，搜一樣，問一樣，愈問愈離題，「佢打開我個銀包，見到幅男女合照相，就問我相入面嗰個係咪我女朋友；打開我個袋，見到隱形眼鏡盒，問我係咪戴con；打開我個飯盒，又問我個飯盒喺邊度買。」
不耐煩的「meme0303」質疑，市民是否有義務滿足警察的好奇心？網友「人人常歡笑」答曰：「呢樣係佢哋（警察）"chok"（盤問）人嘅技巧，如果你突然答唔出，又答得唔自然嘅，佢就會開始懷疑你。如果大家唔係身有『屎』嘅，可以同佢閒話家常，有問有答，包大家無事。」
律師：私隱嘢唔需要答
本身是律師的立法會保安事務委員會副主席涂謹申指出，除了交通法例強制被票控司機必須回答住址，及涉嫌醉酒駕駛的司機必須「吹波波」（法律上視為回答身體狀況）之外，市民沒有法律責任回答警察任何問題，他說：「尤其是問到啲好私隱嘅嘢，好似三圍數字咁，一定唔需要答。」
涂謹申說，有時為了方便警方查案，問題如非太離譜，答了也無傷大雅，算是警民合作，否則可作出投訴。警察公共關係科則回應稱，警務人員會透過適當問題澄清被查人士的身份，所以當市民遇到警務人員查問時，希望能諒解及合作。