薯條就Shake得多，但係ShakeShake青口你又聽過未？中環最近開咗間比利時餐廳，主打比利時經典菜式－青口配薯條，將青口放在白葡萄洒及魚湯中Shake過先夠入味，仲要用兩個特製嘅煲冚住嚟Shake，為青口提升鮮味。
記者：林思樂 攝影：譚盈傑
比利時菜深受法國影響
AuBelge是一間比利時混合法國嘅餐廳，叫混合餐廳是因為比利時菜本身就深受法國影響，主廚Antony話：「因為比利時與法國領土接壤，有4成人講法語，而且有好多法國人居住，我哋嘅顧問就是在比利時定居多年的法國人，所以有不少比利時菜式看似是法國菜，其實在材料、煮法、醬汁方面都有比利時自己的特色，味道與法國餐大不同。」
青口聞名天下
好多人對比利時比較陌生，印象中是一個小國，其實卻是個美食王國，有不少名揚國際的美食，如青口、朱古力、啤酒就是比利時三大飲食代表。比利時菜以海鮮貝殼類最出名，因位於北海沿岸，其中以青口、北海灰蝦、魔鬼魚最令人躍躍一試。AuBelge的材料大多由比利時空運到港，保證原汁原味：「現階段青口每星期二入貨1次，通常星期五就會賣晒，要等到下星期先再有貨，所以我哋已經諗緊辦法增加貨量。」
淡菜鍋
比利時淡菜即青口，Size比一般大，肉質更肥美鮮嫩，秋冬季最當造。法國人會用白酒清煮，不過比利時人就用比利時白葡萄酒再加魚湯，快熟時要不斷搖個煲，令魚湯及酒滲入每隻青口，更加入味。比利時人酷愛薯仔，所以連食青口都配薯條，而且不沾茄醬改配檸檬蛋黃汁。
青口煲睇真啲
1.煲身和蓋其實是大小不同嘅煲，由比利時運到，當地人專用來煮青口，因其耐火力強，傳熱快，能夠於短時間內令青口開殼而不會過熟。
2.煲蓋是讓幾個客人Share青口和盛殼，顯出比利時人愛整潔的特點。
傳統得意食法
當地人食青口有一個特別習慣，就是食完第1隻後，會將那個殼當夾用，夾起其他青口的肉，是有趣的傳統。
香橙伴煙鴨胸$98
這道菜選用高級法國鴨胸，Antony話高級法國鴨胸真正有煙熏香味，是深紅色呈尖長形，而大陸貨就好淺色呈橢圓形。鴨胸咬落果然有好濃的煙熏香味，肉質更有一絲絲質感，就咁食會覺得味道過濃，配埋清新的橙味中和一下就剛剛好。
煎魔鬼魚鰭 $168
比利時的魔鬼魚成本好貴，所以廚師改用澳洲魔鬼魚魚鰭，照樣以正宗比利時煮法炮製，用水瓜柳、牛油煎香，再加以白酒煮成的醬汁，貫徹比利時清淡、原汁原味的風格。食落肉質豐厚嫩滑，軟骨香脆，醬汁與鮮甜的魚肉非常夾。
番茄配灰蝦 $88
灰蝦是當地特產，睇落似蝦亁，食落勁有鮮味，與普通蝦的味道完全不同。灰蝦以鮮牛奶浸過，又腍又彈牙，配上清爽番茄和特色醬汁，爽、鮮、滑混合出獨有美味，難怪有不少外國人都話一試難忘。
比利時黑朱古力慕絲 $58（左）
蘋果批配雪糕 $68（右）
比利時朱古力一向聞名天下，這慕絲用純正比利時朱古力炮製，「朱古力要食落有少少苦味先算靚，證明可可成份高，呢隻朱古力就有70%可可油，味道零舍香。而蘋果批不太甜，表面更有一層脆米，配上香滑比利時雪糕，一凍一熱好滋味。
食神評級（5粒★為滿分）
食物：★★★★
服務：★★★
價錢：★★★
裝修：★★★★
讚：無論材料、煮法、醬汁、配搭、廚具都是十足比利時風味，感覺新鮮。
彈：周末周日幫襯未必食到青口，希望餐廳盡快增加入貨量。
睇路搵食
AuBelge（25241818）
地址：中環奧卑利街11號B地下
營業時間：6:00pm-12:00mn
座位：約30個
