06年市場炒新股炒到癲，城中富豪、基金經理同牛頭角順嫂，都爭相認購新股，07年伊始，即有兩隻新股打孖上，分別係福州民企武夷藥業，同埋財政司長唐英年老竇唐翔千創立、主要產銷印刷電路板嘅美維控股。
招股撞期之外，佢哋嘅機構投資者推介會又撞同一地點，就係大事裝修後重開咗三四個月嘅中環文華東方酒店。只係前後腳，武夷今日，美維聽日，真係約埋都冇咁啱。
因為就腳，文華一直係上市公司嘅活動場地，05年底裝修，關閉咗10個月，喺呢段期間，新開無耐嘅國金二期四季酒店，變成熱門選擇，舊年好多大型新股嘅午宴推介會，都喺四季舉行。
武夷同美維，應該係文華重開後，首批搞午宴推介會嘅客仔，唔知文華會唔會畀個折頭兩間公司呢？