啱啱過去CES展之中，微軟已公布咗唔少《WindowsVista》資料，現場仲有實機睇到㖭，睇怕今年大家都可以有新視窗用，應無走雞！不過你部電腦已經做好支援《Vista》未？講嘅唔係電腦夠唔夠勁，而係你最經常接觸到嘅鍵盤同滑鼠，最近Logitech就推出LX710鍵盤滑鼠組合，當中最特別係鍵盤備有一個《Vista》專用「開始」鍵，預先就設定好《Vista》內各項功能，好似應用程式、遊戲、資料夾同網頁，用家亦可作個人化選擇，能夠自定常用功能，更好享受《Vista》帶來嘅方便。
講完鍵盤，一定要提吓佢隻滑鼠，對鍾意打機或繪圖的用家，對滑鼠要求特別高，好似《RainbowSix》一類第一身射擊遊戲，射中頭同射中身，分別已經好大，LX710所提供LX7滑鼠，有1,000dpi感應度，就能畀到用家成為槍神嘅快感。不過要成為槍神嘅代價都唔少，一套LX710鍵盤加滑鼠，盛惠$699。
記者：許福合
查詢：冠恒集團（31851030）