鰂魚涌CASA880係長實（001）07年首個推出嘅項目，雖然呢座單幢樓仲未正式公開發售，但發展商老早吹風話反應唔錯，仲話有成30單買家握手預留個案，洽購呎價介乎7000到8000蚊。
8000蚊呎 仲話再加
長實仲同傳媒講，呢個盤嘅定價可以再進取些少，所以意向呎價有機會再調高3%，去到平均8200蚊水平。
其實個盤規模好細，得111伙，單位面積分1132同1366方呎，要明年5月先落成，賣得好唔好同貴唔貴，對個樓市都冇咩指標可言。不過，長實定價咁進取，就成功吸引到一班網民嘅注意。
心水清嘅abcpqr喺《香港討論區》話：「『預留』呢個用詞好特別，何方神聖只留不買，冇人同佢爭仲要留，唔似係炒家，更加唔會係用家，咁就只有係地產商嘅自己人去『留』。」
網友mick_mak、motorlegs同樣指CASA880冇理由賣咁貴，大家都覺得鰂魚涌樓唔值7000蚊呎。喺另一個討論區《香港地產城》，網友大出血亦批評CASA880偏離市場價：「御皇臺喺正佢對面，海景又好過佢，都只係賣4000幾蚊呎。」
業界話，港島區新盤供應少，而CASA880鄰近地鐵鰂魚涌站，有佢本身嘅吸引力，但賣到8000蚊呎就真係貴咗啲。事關距離CASA880大約5分鐘步程，同樣係單幢盤兼現樓嘅南豐新盤北角慧雲峯，即買即住貨尾都係賣緊大約7000蚊呎，CASA880仲係15個月樓花，唔係咁多買家可以接受。